Nanganganak pa din (sa aking gunita)
Ang mga makulay at mahalimuyak
Na butil ng kisses. Sa yakap ng bulak
Na mayroong dampi ng alkohol, walang
Alinlangang isa o dalawa’y biglang
Dadami; at kahit sa muling pagsipat
Wala namang bagong mga nakalatag,
Hindi mabitawan, hawak na himala,
Na hawak-hawak pa din at di mabitawan.
Pagkat ang pagdating nitong hinihintay
Na di daw darating (Lohikang kaylupit!),
Ay siyang patunay na p’wedeng malamnan
Ang sinapupunang walang lama’t patay–
Pag-asa’y pag-asa, kahit na masakit.